ഏഷ്യൻ ഗെയിംസിലെ പുരുഷ സിംഗിൾസ് സ്ക്വാഷിലും വനിതാ സ്ക്വാഷ് സിംഗിള്സിലും ഇന്ത്യയ്ക്ക് വെള്ളി. പുരുഷ സിംഗിൾസ് സ്ക്വാഷിൽ ഇന്ത്യയുടെ അഭയ് സിങ്ങിനാണ് വെള്ളി. ഫൈനലിൽ മലേഷ്യയുടെ എൻ എയിൻ യോവിനോടാണ് സിങ് തോൽവി വഴങ്ങിയത്.
മത്സരത്തിൽ മികച്ച രീതിയിൽ മുന്നേറിയ അഭയ് സിങ് ഒരു ഘട്ടത്തിൽ 4–2ന് ലീഡ് നേടിയിരുന്നു. എന്നാൽ തുടർച്ചയായ പിഴവുകൾ താരത്തിന് തിരിച്ചടിയായി. ഇതോടെ എയിൻ യോവ് മത്സരത്തിലേക്ക് തിരിച്ചു വന്നു. നിർണായക ഘട്ടത്തിൽ 6–5ന് മലേഷ്യൻ താരം മുന്നിലെത്തി. തുടർന്ന് എയിൻ യോവ് മത്സരം നിയന്ത്രണത്തിലാക്കുകയായിരുന്നു.
വനിതാ സ്ക്വാഷ് സിംഗിള്സില് അനാഹത് സിങ് വെള്ളി നേടി. സ്വർണം കൈവിട്ടെങ്കിലും ഏഷ്യൻ ഗെയിംസ് വനിതാ സിംഗിൾസ് സ്ക്വാഷിൽ വെള്ളി നേടുന്ന ആദ്യ ഇന്ത്യൻ താരമെന്ന ചരിത്ര നേട്ടം 18കാരി സ്വന്തമാക്കി. നിലവിലെ ഏഷ്യന് ഗെയിംസ് സ്വര്ണ ജേതാവ് മലേഷ്യയുടെ ശിവസാരംഗി സുബ്രഹ്മണ്യത്തോടാണ് അനാഹത് ഫൈനലില് പരാജയപ്പെട്ടത്. നിലവിലെ ചാംപ്യന് മുന്നില് പൊരുതാന് പോലും അനാഹതിനു സാധിച്ചില്ല. സ്കോര്: 4-11, 4-11, 5-11.
content highlights: asian-games-squash-india-wins-silver-in-mens-and-womens-singles